نصيب الفقير / بقلم الشاعر السيد عبد الكريم أحمد

الفقير مهما إشتغل
نصيبه فكة
وإن قِدر على قراءة الفاتحة
ما يقدر على الشبكة
يا ريت يريح البلد
و يقعد إحتياطى ع الدكة
زاحمها بس
و عامل فيها ربكة
و تأثيره مش فعال
كتأثير شكة
ولا حد بيسمع له مشكى
ولا حد بيفوت له غلطة
و لا حد بينقذه لو دخل عركة
ويركبوه الغلط
ولو كان مدكوك فى جنبه مية دكة
ياما ناح
و كم نواحه أبكى
و ساعات كلامه الحزين
يلسع القلب كلسعة المكوى
ويمكن يكون
عن غيره أذكى
ولو كان ذكى
كان لعب بالبيضة و الحجر
من غير ما يحكوا بعض أى حكة